កុមារកំសត់ (បទកាកគតិ)
១.គួរអោយអនិច្ចា ជីវិតកុមារ ដែលខ្សត់ទ្រព្យា
ខិតខំធ្វើការ ដោយក្តីវេទនា ប្រឹងប្រែងពុះពារ
តស៊ូអំណត់។
២.គ្មានពេលទំនេរ ដៃយួរស្បោងបេ គួរអោយកំសត់
ដើររើសអេតចាយ ទោះឃ្លានខំអត់ ព្រោះតែក្រខ្សត់
ធនធានទ្រព្យធន។
៣.មើលចុះពួកគេ ម្នីម្នារិះរេ គិតឆ្លៀតរែកពន់
ទោះក្រលំបាក មិនដែលទម្រន់ ធ្វើការងារធ្ងន់
ខាំមាត់អត់ធន់។
៤.គ្មានទេអាវថ្មី រហែកដាច់យ៉ៃ ខំពាក់បន្លំ
បិទបាំងរាងកាយ មើលគ្មានអ្វីសម ព្រោះខ្លួននេះពុំ
ដូចក្មេងដទៃ។
៥.កូនគេអ្នកមាន ស្លៀកពាក់ល្អគ្មាន អ្វីមកកាឡៃ
ដើរស្ពៀយសំពៀត រវាសរវៃ ជិះកង់ចិនថ្មី
សំដៅសាលា។
៦.រីក្មេងយើងវិញ ស្រវាស្រទិញ រិះរកស្បោងណា
យកមកជាប់ខ្លួន សំដៅទីផ្សារ រឺក៏ទីណា
ដែលគរកំណប់។
៧.ដល់ហើយរិះរក ខំលៃខំលក វត្ថុដែលគាប់
រើសយកមកទុក ទុកជាគំនាប់ ព្រោះវាជាទ្រព្យ
អាចដូរបាយបាន។
0 comments:
Post a Comment