The Education in Cambodia Study Of Story Khmer​​ សិក្សាអត្ថបទរឿ ង ទុគ៌ជន (​ត)(វិភាគតួអង្គ)

៤. វិភាគតួអង្គ

៤.១. រាយនាមតួអង្គ និងមុខងារ

-       Jean Valjean ឬ M. Madelein ឬ M. Leblance  តួអង្គឯកក្នុងរឿង

-       Cosette ឬ Ursula ជាកូនស្រីរបស់នាង Fantine

-       Marius កូនរបស់ Pontmercy និងជាស្វាមីរបស់នាង Cosette

-       Fantine ជាម្តាយរបស់ Cosette

-       Javert ជាអធិការប៉ូលីស

-       M. Thénardier ឬ Jondrette ជាម្ចាស់តៀមលក់ចំណីអាហារ

-       Mme. Thénardier ជាប្រពន្ធរបស់ M. Thénardier

-       Éponine កូនស្រីរបស់ M. Thénardier

-       AZelma ជាកូនស្រីរបស់ M. Thénardier

-       Gavroche ជាកុមារដែលម៉ែឪបោះបង់ចោល

-       Myriel ព្រះសង្ឃកាតូលិក

-       Mlle. Baptistine ជាប្អូនស្រីរបស់ព្រះសង្ឃកាតូលិកចិត្តល្អ

-       Mme. Magloire ជាអ្នកបម្រើរបស់ព្រះសង្ឃកាតូលិកចិត្តល្អ

-       Champmathieu ជាមនុស្សដែលគេចាប់ច្រឡំ និងយល់ថាជា Valjean

-       Petit-Gervais ជាក្មេងដែល Valjean ដណ្តើមប្រាក់

-       Enjolras ជាមិត្តភក្តិរបស់ Marius

-       M. Georges Pontmercy ជាឪពុករបស់ M2arius

-       M. Gillenormand ជាជីតារបស់ Marius

-       Urbain Fabre ជាឈ្មោះដែល Valjean បោកប្រាស Thénardier

-       Fauchelevent ជាបររទេះ ដែល Valjean បានជួយ

-       Tholomyès ជានិស្សិតចិត្តអាក្រក់បំផ្លាញអនាគត Fantine រួចបោះបង់ចោល

៤.២. វិភាគតួអង្គសំខាន់ៗ

·         Jean Valjean

+ គុណសម្បត្តិ

-       ជាមនុស្សដែលមានការតស៊ូក្នុងជីវិត

-       មានចិត្តធម៌ ជួយសង្គ្រោះ និងយកអាសារអ្នកដទៃ

-       មានចិត្តស្មោះត្រង់ ទទួលស្គាល់ការពិត

-       ជាមនុស្សប្រកបដោយវិចារណញាណ

-       ចេះដោះស្រាយហេតុការណ៍កើតឡើងភ្លាមៗដោយភាពវ័យឆ្លាត

+ គុណវិបត្តិ

-       ពេលខ្លះមានចិត្តឆេវឆាវ

-       មិនគោរពច្បាប់រដ្ឋ

·         Cosette

+ គុណសម្បត្តិ

-       មានសម្រស់ស្រស់ស្អាត

-       ស្មោះត្រង់ចំពោះស្នេហា

-       ជាមនុស្សប្រកបដោយឧត្តមគតិក្នុងការចូលរួមក្នុងការធ្វើបដិវត្តន៍

+ គុណវិបត្តិ

-       មិនស្តាប់បង្គាប់ឪពុកម្តាយ លួចមានស្នេហា

·         Marius

+ គុណសម្បត្តិ

-       ជាកូនប្រុសរបស់ត្រកូលអភិជន មានចំណេះវិជ្ជាខ្ពស់

-       មិនចេះប្រកាន់វណ្ណៈ

-       មានភក្តីភាពចំពោះស្នេហា

-       មានឧត្តមគតិខ្ពស់ តស៊ូវណ្ណៈ បំបាត់នូវអំពើជិះជាន់ក្នុងសង្គម

+ គុណវិបត្តិ

-       ឆាប់តក់ស្លុតចំពោះហេតុការណ៍ដែលកើតឡើងភ្លាមៗ

-       មានការផ្តេកផ្តួលចំពោះស្នេហាខ្លាំង

-       មានចិត្តឆេវឆាវក្នុងការដោះស្រាយបញ្ហាចំពោះមុខ

-       មានចិត្តធំ មិនស្តាប់បង្គាប់ចាស់ទុំ

·         Fantine

+ គុណសម្បត្តិ

-       ជាម្តាយដ៏សែនល្អ បានលះបង់អ្វីៗគ្រប់យ៉ាងដើម្បីកូន

-       ជាមនុស្សតស៊ូ ពុះពារគ្រប់ឧបសគ្គក្នុងសង្គមដើម្បីជីវិត

+ គុណវិបត្តិ

-       មិនគោរពប្រពៃណី

-       ដោះស្រាយបញ្ហាដោយមិនបានគិតគូរឲ្យបានវែងឆ្ងាយ

·         Javert

+ គុណសម្បត្តិ

-       ជាមន្ត្រីដែលអនុវត្តច្បាប់រដ្ឋបានល្អ

-       ចេះស្គាល់គុណទោស

+ គុណវិបត្តិ

-       មិនចេះពិចារណាឲ្យបានវែងឆ្ងាយក្នុងការធ្វើកិច្ចការអ្វីមួយ

-       ដោះស្រាយបញ្ហាដោយភាពល្ងង់ខ្លៅ

·         Thénardier

+ គុណសម្បត្តិ

-       ជាមេគ្រួសារដែលគិតគូរពីជីវភាពក្រុមគ្រួសារ

-       មានមនុស្សធម៌ម្តងម្កាល

+ គុណវិបត្តិ

-       ជាមនុស្សគ្មានគុណធម៌ រំលោភសិទ្ធិកុមារ

-       មានគំនិតរើសអើង កេងប្រវ័ញ្ចញើសឈាមពីអ្នកដទៃ

-       ជាមនុស្សថោកទាប ឆ្លៀតឱកាសក្នុងពេលគេកំពុងមានអាសន្ន

-       ប្រឌិតរឿង បោកប្រាសដើម្បីកេងចំណេញពីអ្នកដទៃ

·         Éponine

+ គុណសម្បត្តិ

-       ជាកូនដែលស្តាប់បង្គាប់ឪពុកម្តាយ

-       មានចិត្តស្មោះត្រង់ ហ៊ានពលិកម្ម ចំពោះស្នេហា និងអ្នកដែលខ្លួនស្រឡាញ់

-       មានឧត្តមគតិក្នុងការចូលរួមធ្វើបដិវត្តន៍ដើម្បីកែទម្រង់របបនយោបាយសង្គម

+ គុណវិបត្តិ

-       មានគំនិតអាត្មានិយម

-       មានគំនិតខ្លីក្នុងការដោះស្រាយបញ្ហា

·         Myriel

+ គុណសម្បត្តិ

-       ជាមនុស្សដែលមានចិត្តសប្បុរសធម៌ មានចិត្តទូលាយចំពោះមនុស្សគ្រប់គ្នា

-       ជួយស្រោចស្រង់ជីវិតមនុស្សដែលកំពុងមានអាសន្ន

-       អប់រំមនុស្សឲ្យប្រព្រឹត្តអំពើល្អ ឲ្យមានសេចក្តីសង្ឃឹមក្នុងជីវិត

+ គុណវិបត្តិ

-       មានចិត្តល្អជ្រុល

·         Enjolras

+ គុណសម្បត្តិ

-       មានចំណេះវិជ្ជាខ្ពង់ខ្ពស់

-       មានមនសិការខ្ពស់ក្នុងដំណើរការបដិវត្ត តស៊ូវណ្ណៈ ការជិះជាន់ក្នុងសង្គម

+ គុណវិបត្តិ

-       ឆេវឆាវក្នុងការដោះស្រាយបញ្ហាចំពោះមុខ

 ជំពូក ២

 វិភាគអត្ថន័យ

១. ប្រធានរឿង

            ប្រធានរឿង ដែលអ្នកនិពន្ធលើកយកមកបង្ហាញតាមរយៈរឿងទុគ៌តជន គឺដំណើរជីវិត​របស់​យុវ​ជនបារាំង ដែលរស់នៅដោយគ្មានទីពឹង និងពោរពេញទៅដោយឧបសគ្គ​រាប់មិនអស់​ជាមួយការតស៊ូប្រ​ឈមមុខនឹងសង្គម ដំណើរជីវិតរបស់ពួកគេប្រព្រឹត្តទៅដោយ​ភាពទីទ័លក្រ​លំបាក សុខចិត្តធ្វើអ្វីៗគ្រប់យ៉ាង​ដើម្បីមានជីវិតរស់នៅ ។ ឧបសគ្គទាំង​ប៉ុន្មាន អ្ន​កនិពន្ធបានទម្លាក់​ទៅលើ​ភាពអយុត្តិធម៌ក្នុងសង្គម ការគ្រ​ប់គ្រងដែលបាត់​នូវជំនឿចិត្ត ការបង្កភាពចលាចល ភាព​អនាធិបតេយ្យ និងការបះបោរជាហេតុបណ្តាល​ឲ្យមានអថេរភាពនៅក្នុងសង្គម ។ ប៉ុន្តែនៅទី​បំផុត អ្នកនិពន្ធបានសម្រេចចិត្តផ្តល់នូវ​ដំណោះស្រាយមួយស​មស្រប គឺការប្រកាន់យកសីលធម៌​ក្នុងខ្លួន តាមរយៈការដាក់ទាន និងការសន្តោសប្រោសប្រណី ។

២. មូលបញ្ហារឿង

            តាមដំណើររឿង ដែលអ្នកនិពន្ធបានលើកជាសំខាន់នោះ ស្ថិតនៅត្រង់ថា តើតួអង្គ​ត្រូវ​ជ្រើសរើស​យកនូវដំណើរជីវិតដោយរបៀបណា ? ផ្លូវណាដែលគេត្រូវដើរ ? ហើយនឹង​រកដំណោះ​ស្រាយយ៉ាងណា​ដើម្បីឲ្យជីវិតបានប្រសើរ ?

            នៅចំពោះមុខចំណោទបញ្ហាក្នុងជីវិត ដែលកំពុងជួបប្រទះនូវភាពអត់ឃ្លាន គ្មានទី​ជម្រក គ្មានញាតិ​មិត្ត និងការទទួលរងនូវទណ្ឌកម្មពីសង្គម អ្នកនិពន្ធបានសម្រេចចិត្ត​ប្រកាន់យកនូវ​សីលធម៌ជាប់ខ្លួនតាមរយៈការដាក់ទាន ការសន្តោសរបស់តួអង្គ និងការ​ជួយដល់អ្នកដទៃ នៅ​ពេលជួបការលំបាក​ ។ សកម្មភាព​ទាំងនេះ អ្នកនិពន្ធស្តែងឡើង​តាមរយៈតួអង្គ Jean Valjean និង​ព្រះសង្ឃកាតូលិកម្នាក់ ។

            តាមរយៈរឿងនេះដែរ យើងអាចទាញនូវបញ្ហាសំខាន់ៗដូចខាងក្រោម​​៖

                  -បញ្ហាជីវភាពគ្រួសារ

                  -បញ្ហាសាសនា

                  -បញ្ហាស្នេហា

                  -បញ្ហាគ្រួសារ

                  -បញ្ហាគុណធម៌

                  -បញ្ហានយោបាយ និងការគ្រប់គ្រង

៣. វិភាគបញ្ហា

            ៣.១. បញ្ហាជីវភាពគ្រួសារ

            ក្នុងជីវិតរស់នៅមនុស្សយើងម្នាក់ៗ តែងចង់រស់នៅប្រកបដោយសុភម​ង្គល ។ ក៏ប៉ុន្តែ​​សុភមង្គលដែលទទួលបាន គឺវាមិនសមប្រកបដូចមនុស្សគ្រប់រូបចង់បាននោះទេ ព្រោះ​នៅក្នុង​សង្គមតែងមាន អ្នកមាន​ និងអ្នកក្រជានិច្ច ។ ហើយបញ្ហាទីទ័លក្រ និងភាពទីទ័លច្រកបានបង្ខំ​មនុស្សយើ​ងឲ្យហ៊ានធ្វើអំពើអមនុស្សធម៌ផ្សេងៗ ។ ដូចមាននៅក្នុងដំណើរ​រឿង អ្នកនិពន្ធបាន​បង្ហាញតួអង្គ Jean Valjean ដោយសារតែភាពទ័លច្រកគាត់បាន​សម្រេចចិត្តលួចនំបុ័ងនៅក្នុង​ហាងមួយឲ្យក្មួយដែលកំពុង​ឃ្លាន ពេលនោះប៉ូលីសបាន​ឃើញក៍ចាប់គាត់ដាក់ពន្ធនាគារប្រាំឆ្នាំ ។​ បន្ទាប់ពីចេញពីគុក គាត់បាន​ទៅស្នាក់​នៅជាមួយលោកសង្ឃកាតូលិក ហើយបានលួច​យកមាស​ប្រាក់របស់លោកសង្ឃនោះ ។ ក្រោយម​កលោកបានលួចយកប្រាក់ក្មេងប្រុសម្នាក់ឈ្មោះ Petit-Gervais ។ អ្នកនិពន្ធក៏បាន​បង្ហាញផងដែរអំពីតួអង្គនាង​ Fantine ដោយសារបញ្ហាជីវភាព នាងបានសម្រេចចិត្តកាត់ សក់លក់ ប៉ុន្តែថវិកាមិនទទួលបានគ្រប់គ្រាន់ ​នាងក៍ទៅលក់ខ្លួនធ្វើជា​ស្រីពេស្យា ។

            ទាំងនេះសបញ្ជាក់ឲ្យឃើញថា បញ្ហាជីវភាពទីទ័លក្រ ពិតជាបង្ខំមនុស្សឲ្យ​ដើរក្នុងផ្លូវមួយ ដែលស​​ង្គមស្អប់ខ្ពើម និងមិនឲ្យតម្លៃ ។

            ៣.២. បញ្ហាសាសនា

            សាសនានីមួយៗតែងអប់រំមនុស្សឲ្យធ្វើអំពើល្អ អប់រំមនុស្សឲ្យចេះយោគយល់អធ្យាស្រ័យ​គ្នាទៅវិញទៅមក ទោះបីជាបុគ្គលនោះមានកំហុសក៏ដោយ សាសនាមិនដែល​អប់រំមនុស្ស​ឲ្យ​ប្រព្រឹត្តអំពើអាក្រក់ឡើយ ។ តាមរយៈការយោគយល់អធ្យាស្រ័យនេះ គឺ​បង្ហាញនៅក្នុងសាច់រឿង អំពី​ការប្រោសប្រណីរបស់លោកសង្ឃកាតូលិកចំពោះ Jean Valjean ដែលបានលួចយកប្រាក់​គាត់​ហើយត្រូវប៉ូលីសចាប់មកប្រគល់ឲ្យលោកសង្ឃ នេះវិញ តែគាត់មិនបានយកទោសពៃអ្វីទេ ថែមទាំងផ្ដល់​ប្រាក់បន្ថែមឲ្យ Jean Valjean ទៀតផង​​។​​​ ចំណែកនាង​ Cosette ដោយសារនាងជា​ក្មេងកំព្រា ក៏ត្រូវបាន​សាសនាជួយ​ប្រាក់ឧបត្ថម្ភ​ក្នុងក្របខណ្ឌអ្នកបួសដែរ។

            ដូចនេះអ្នកនិពន្ធបានបញ្ចូលសាសនាក្នុងសាច់​រឿង ក្នុងគោលបំណងបង្ហាញឲ្យ​ឃើញថា សាសនាមានតួនាទីសំខាន់ណាស់ក្នុងការអប់រំមនុស្ស និងជួយទំនុកបម្រុង​មនុស្សឲ្យពួកគេរួចផុត​ពីការប្រព្រឹត្តអំពើអមនុស្សធម៌ផ្សេងៗ។

            ៣.៣. បញ្ហាស្នេហា

            ស្នេហា គឺជាបញ្ហាសំខាន់ និងចាំបាច់ខ្លាំងណាស់ក្នុងជីវិតរបស់មនុស្សគ្រប់រូប ហើយ​មិន​ដែលនរណាម្នាក់គេចរួចផុតពីសេចក្តីស្នេហានេះបានឡើយ ស្នេហាបានធ្វើឲ្យ​ជីវិតរបស់មនុស្ស​ស្រស់បំព្រង ដែលមនុស្សត្រូវការចាំបាច់ចំពោះស្នេហានេះ ។ ស្នេហា​មានច្រើនសណ្ឋាន ច្រើន​បែបណាស់ដូចជា ស្នេហារវាងម្តាយឪពុកនិងកូន រវាងបង​និង​​ប្អូន រវាងបុរសស្ត្រី ហើយក៏ព្រោះតែ​ស្នេហានេះ​ដែរ ដែលបានកំណត់វាសនារបស់មនុស្ស​ឲ្យល្អ អាក្រក់ ទាបខ្ពស់ សុខសប្បាយ​ទុក្ខព្រួយផ្សេងៗ ឃើញ​ថាមានលទ្ធផលច្រើន​ណាស់ដែលបានមកពីសេចក្តីស្នេហានេះ ។ ដូចមាន​បង្ហាញនៅក្នុងរឿង នាង Fantine មាន​ទំនាក់ទំនងស្នេហាជាមួយនិសិ្សតម្នាក់រហូតមានកូនមួយ ហើយត្រូវនិស្សិតនោះ​បោះបង់ចោល ។ បញ្ហានេះ​ហើយដែលធ្វើឲ្យ Fantine​ បានទទួលរងការ​រើសអើង និងបញ្ឈប់ពីការងារ ។ មួយវិញទៀត យុវជន Marius​ ពេលឃើញនាង Cosette  ភ្លាម បានចាប់ចិត្ត​ស្រលាញ់ភ្លាម ក្រោយមក​ Valjean បំបែក Cosette មិន​ឲ្យ Marius បានជួប ។​ តែ​ក្រោយមកទៀត Marius បានដំណឹងពី​ Cosette ​ហើយស្កាត់ទៅជួបដោយ​ភាពស្និទ្ធស្នាល​សប្បាយរីករាយ ។ ក្រោយមកក៏បាត់ដំណឹងពី Cosette ទៀត Marius មានការ​ពិបាកចិត្ត​មាន​បំណងចង់ស្លាប់ ក៏ចូលរួមជាមួយក្រុមនិសិ្សតក្នុងការបះបោរប្រឆាំងនឹង​រដ្ឋាភិបាល ។

            ៣.៤. បញ្ហាគ្រួសារ

            ជាធម្មតានៅក្នុងរង្វង់គ្រួសារនីមួយៗ តែងមានភាពថ្នាំងថ្នាក់រវាងគ្នា និងគ្នា ដូចជា​នៅក្នុង​គ្រួសាររបស់ Marius ដោយមានការប្រកាន់របបនយោបាយខុសគ្នាបានធ្វើឲ្យ គ្រួសារនេះ​មានការបែកបាក់គ្នា ។ ឪពុករបស់ Marius និង​ Marius ប្រកាន់នយោបាយ​សាធារណរដ្ឋ ចំនែកជីតារបស់គេវិញ ប្រកាន់របបនយោបាយរាជាធិបតេយ្យ ។

            ដូចនេះតាមរយៈសាច់រឿងគឺបានឆ្លុះបញ្ចាំងឲ្យឃើញថា បញ្ហាប្រកាន់នយោបាយ​ផ្សេងគ្នា គឺពិត​ជាធ្វើឲ្យប្រជាពលរដ្ឋបារាំងរស់នៅតាមបែបផែនខុសគ្នា។

                  ៣.៥. បញ្ហាគុណធម៌

            ​គឺសំដៅទៅលើការចេះជួយយកអាសារគ្នាទៅវិញទៅមក នៅពេល​ជួបបញ្ហាលំ​បាក ឬនៅ​ពេលអាសន្ន  រឿងនេះអ្នកនិពន្ធបានបង្ហាញឲ្យឃើញគុណធម៌ តាមរយៈតួអង្គជា​ច្រើនដូចជា​ Jean Valjean គាត់បានជួយចិញ្ចឹមបងស្រីបង្កើត ដែលជាស្រីមេម៉ាយមាន​កូនប្រាំពីរនាក់​ដោយ​ការកាប់ឈើតាមផ្លូវថ្នល់ ។ នៅពេលដែល Jean Valjean បាន​ក្លាយជាប្រធានរោងចក្រ និងជាចៅ​ហ្វាយក្រុង លោកបានជួយធានានាង Fantine ឲ្យ​ចេញពីពន្ធនាគារ ។ គាត់បានជួយលោកតា Fauchelevent នៅពេលមានគ្រោះថ្នាក់ ។ ក្រោយពេលគាត់បានធ្លាក់ពីចៅហ្វាយក្រុង គាត់បាន​យកនាង Cosette ដែល​ជាកូន​របស់ Fantine មកចិញ្ចឹម ។​ ជាងនេះទៅទៀត គាត់បានដោះលែង​ប៉ូលីស Javert នៅ​ពេលគាត់បណ្ដើរយកទៅសម្លាប់ ។ Marius មានរបួសក្នុងពេលធ្វើបដិវត្តន៍ Jean Valjean បាននាំ Marius ពី Barricade ទៅជួបជីតារប​ស់គេ ។ លោក​តា Fauchelevent បាន​ជួយ Jean Valjean ឲ្យគេចចេញពីប៉ូលីសតាមរទេះសេះ ។ Thénardier បានជួយ​បើកទ្វារផ្លូវក្រោម ដីឲ្យ Jean Valjean រត់គេចពីប៉ូលីសរដ្ឋាភិបាល នៅពេល Marius មាន​របួស ។ ប៉ូលីស Javert បាន​ជួយដោះលែង Jean Valjean ឲ្យរួចខ្លួនព្រោះ Valjean បាន​ជួយជីវិតគាត់ម្ដងដែរ រួចគាត់ក៏បាន​លោតទឹកសម្លាប់ខ្លួនព្រោះបានដោះលែងអ្នកទោស ។

            សរុបមកអ្នកនិពន្ធពិតជាបានបង្ហាញអំពីគុណធម៌ តាមរយៈសកម្មភាពរបស់តួអង្គ ដែល​

បានជួយ​គ្នាទៅវិញទៅមកនៅពេលមានអាសន្ន ។

            ៣.៦. បញ្ហានយោបាយ និងការគ្រប់គ្រង

            អ្នកនិពន្ធបានលាតត្រដាងឲ្យឃើញពីរបបគ្រប់គ្រងពីរគឺ របបសាធារណរដ្ឋ និង​របប​គ្រប់គ្រងបែបរាជាធិបតេយ្យ ។ របបទាំងពីរនេះបានធ្វើការប្រឆាំងគ្នា ប្រជារាស្រ្ត​ក្រីក្រ អ្នកគ្មាន​ការងារធ្វើបានសម្រេចចិត្តដើរតាមអ្នកសាធារណរដ្ឋ ធ្វើការប្រមូលផ្ដុំគ្នា បះបោរប្រឆាំងនឹងរបប​គ្រប់គ្រងបែបរាជាធិបតេយ្យ ។ ដូចជាតួអង្គ Marius សុខចិត្តចាកចេញពីក្រុមគ្រួសារ ដើម្បីចូលរួម​ជាមួយនិស្សិតសាធារណរដ្ឋ ព្រោះតែគ្រួសាររបស់ខ្លួន នឹងខ្លួនមានរបបនយោបាយខុសគ្នា ។ អ្នក និពន្ធ​បានបង្ហាញផងដែរ អំពីតួអង្គផ្សេងៗទៀត​ដែលបានចូលរួមក្នុងការធ្វើបដិវត្តន៍នេះ ដូចជា តួអង្គ Enjolras Éponine Gavroche ជា​ដើម ។

            ដូចនេះ នៅប្រទេសបារាំងក្នុងសម័យនោះ ប្រទេសជាតិមានភាពច្របូកច្របល់ក្នុង​ប្រទេស មាន​ភាពអសន្តិសុខ ភាពអយុត្តិធម៌ ធ្វើឲ្យប្រជារាស្រ្តអស់ជំនឿ ហើយធ្វើការ​ប្រឆាំង ។

៣. ឧត្ដមគតិរឿង

            តាមរយៈអត្ថន័យនៃរឿងយើងអាចទាញបានគំនិតអប់រំដូចខាងក្រោម៖

-       អប់រំមនុស្សឲ្យចេះជួយគ្នាក្នុងគ្រាមានអាសន្ន

-       ធ្វើឲ្យមនុស្សចេះតស៊ូក្នុងឆាកជីវិត

-       អប់រំមនុស្សឲ្យមានគុណធម៌ សីលធម៌ក្នុងការរស់នៅ

-       អប់រំមនុស្សឲ្យចេះលះបង់ផលប្រយោជន៍ផ្ទាល់ខ្លួន ដើម្បីផលប្រយោជន៍រួម

-       ស្នេហាស្មោះស្ម័គ្រ

-       អប់រំមនុស្សឲ្យចេះគោរពច្បាប់សង្គម

-       បង្ហាញពីចរិកស្នេហាជាតិ

-       ធ្វើឲ្យមនុស្សចេះរើបម្រះពីវណ្ណៈជិះជាន់​ដើម្បីសិទ្ធិសេរីភាព

-       អប់រំអ្នកដឹកនាំឲ្យចេះគិតគូរដល់ប្រជារាស្រ្ត

-       អប់រំមនុស្សឲ្យចេះគិតគូរពិចារណាឲ្យបានល្អិតមុននឹងធ្វើអ្វីមួយ