Khmer Poems អារម្មណ៍បទ(បទ មេបួន)

អារម្មណ៍បទ(បទ មេបួន)

          ១.ខ្ញុំអានស្នាដៃ  កវីជាន់មុន  លោកតែងរិះគន់ ស្ថាបនាសង្គម​ ។

          ២.លោកពុំចូលចិត្ត សម័យនិយម  ដែលចូលបន្ទំ ចិត្តខ្មែរប្រុសស្រី ។

          ៣.អោយឈ្លក់វក់វី  ភ្លេចភ្លាំងស្មារតី ភ្លេចអស់ប្រពៃ ណីដូនតាខ្មែរ ​។

          ៤.សម័យស្រីស្អុះ  កវីតែងតែ  លើកមកហូរហែ បង្ហាញអ្នកអាន ​។

          ៥.ថាស្រីសព្វថ្ងៃ តុបតែងអង្គប្រាណ ពិបាកសន្តាន ភ្នែកញាតិស្រីប្រុស ។

៦.បង្ខើចពន្លេច ​ចេញសាច់សក្បោស លេចអីលេចចុះ អោយប្រុសៗគួច ។

៧.អ្នកខ្លះប្រឹងស្លៀក ចងថ្នក់លះលួច  វះវាលក្របួច  ខាងខ្នងទទេ ។

៨.ខ្លះប្រឹងរឹតរាង ណែនក្បំផស់គេ​ ប្រុសឃើញរិះរេ  ប៉ាន់គួចបន្ថែម ។

៩.នាងខ្លះសំយ៉េះ ស្ទើរបេះតែម  អាវខើចមានថែម  ចេញក្បាលពោះស្អុយ ។

១០.ឥលូវរូបខ្ញុំ ចិត្តចង់ប្រថុយ ​កាន់ការតាង៉ុយ  កវីស្រុកស្រែ ។

១១.ចង់ចាត់តាក់តែង  កាព្យដូចតាដែរ  ខ្លាចមិនពូកែ  គំនិតនៅខ្ចី។

១២.ចង់បន្តវេន ស្នងបុព្វការី លោកអ្នកកវី ស្នាដៃកាព្យា  ។

១៣.មានព្រះសម្ភារ កវីអ្នកជា  តែងមានសទ្ធា  បូជាសាសនា  ។

១៤.ព្រះភិក្ខុសោម ស្នាដៃអស្ចារ្យ ​ទុំទាវនោះណា  គ្មានល្អៀងល្អក់សោះ  ។

១៥.ល្បីល្បាញសាយសុះ   គ្រប់កាលឥតមោះ ល្បីសមដូចឈ្មោះ

       តែងលើកសិក្សា។

១៦.លោកគយ សារុន ម្ចាស់កាព្យបុប្ផា ខ្មៅនោះរែងជា ស្នាដៃចំណាន ។

១៧.កវីច្រើនទៀត យើងខ្ញុំពុំបាន លើកមកគ្រប់ប្រាណអោយអស់នោះឡើយ។

១៨.តែសូមរៀបរាប់ ប៉ុណ្ណឹងបានហើយ ខ្ញុំមិនកន្តើយ កាន់កិច្ចចាស់ទុំ។

១៩.រៀបរាប់រឿងរាវ បញ្ហាសង្គម បង្ហាញដោយពុំ លាក់លៀមបាំងបិទ។

២០.តទៅខ្ញុំនឹង ប្រឹងប្រែងខំខិត រិះរកគំនិត ប្រឌិតតាមការ។